Mosha reale mund të jetë vetëm një numër, por mosha biologjike thotë shumë më tepër për jetëgjatësinë e njeriut. Shoqata Amerikane e Zemrës publikoi një studim të bazuar në 6,500 të rritur, duke arritur në përfundimin se ndjekja e disa udhëzimeve mund të zvogëlojë “moshën biologjike” të një personi deri në pesë vjet.
Kardiologët thonë se një 27-vjeçar që pi duhan, nuk ushtron dhe ha keq, për shembull, mund të ketë një moshë biologjike 32. Dhe e kundërta, një 49-vjeçar që fle mirë dhe ka një dietë të shëndetshme mund të ketë një moshë biologjike 44.
Ka një mori aspektesh të stilit të jetesës që mund të ndihmojnë në minimizimin e moshës biologjike të dikujt. Shumë prej tyre janë pjesë e listës të publikuara nga Shoqata Amerikane e Zemrës.
“Të kesh shëndet të mirë kardiovaskular mund të ngadalësojë ritmin e plakjes biologjike, gjë që mund të zvogëlojë rrezikun e zhvillimit të sëmundjeve kardiovaskulare dhe sëmundjeve të tjera të lidhura me moshën, duke zgjatur jetën”, thuhet në një deklaratë zyrtare nga Shoqata Amerikane e Zemrës. Por cilat janë 8 zakonet thelbësore?
Hani ushqime me vlera ushqyese
Mundohuni të konsumoni kryesisht ushqime si fruta, perime, proteina pa yndyrë, arra dhe fara.
Lëvize trupin. Nëse nuk bëni dot stërvitje apo palestër, ka plot akvitivete të tjera, mjafton të zgjidhni atë që ju pëlqen. Ecja, vrapi, kërcim, joga, etj. Mjekët sugjerojnë të mos lëvizni gjithmonë me makinë dhe të shmangni ashensorin.
Lëreni duhanin
Pirja e duhanit dihet gjerësisht se kontribuon në shëndetin e dobët kardiovaskular, por sipas Shoqatës Amerikane të Zemrës, edhe për ata që nuk e pinë por janë afër tymit janë të rrezikuar. Cigaret “tradicionale” nuk janë problemi i vetëm.
Bëni gjumë të shëndetshëm
Shoqata Amerikane e Zemrës pohon se të rriturit duhet të synojnë mesatarisht shtatë deri në nëntë orë gjumë në natë, sepse “shumë pak ose shumë gjumë lidhet me sëmundjet e zemrës, tregojnë studimet”.
Menaxhoni peshën
Ekspertët dhe Shoqata Amerikane e Zemrës gjithashtu vërejnë se mbajtja e një peshe të duhur për llojin tuaj specifik të trupit mund t’ju ndihmojë të rrisni jetëgjatësinë dhe të përmirësoni moshën tuaj biologjike. Kjo nuk do të thotë dietë ekstreme dhe fiksim se si duket trupi juaj – kjo qasje është shpesh e kundërta e shëndetit të mirë. Në vend të kësaj, përqendrohuni në ngrënien e ushqimeve ushqyese dhe lëvizjen e trupit tuaj në një mënyrë që të ndjeheni mirë. Çdo trup është i ndryshëm.
Kontrolloni kolesterolin
Nivelet e larta të lipoproteinës me densitet të ulët, i njohur gjithashtu si kolesteroli i keq, janë lidhur me sëmundjet e zemrës, goditjet në tru dhe më shumë, prandaj është e rëndësishme të monitoroni numrat tuaj të paktën një herë në vit.
Menaxhoni sheqerin në gjak
Në një nivel biologjik, pothuajse çdo gjë që hamë shndërrohet në glukozë ose sheqer në gjak, gjë që trupi ynë e përdor si energji.
“Me kalimin e kohës, nivelet e larta të sheqerit në gjak mund të dëmtojnë zemrën, veshkat, sytë dhe nervat tuaja”, thotë Shoqata Amerikane e Zemrës në udhëzimet e saj.
Menaxhoni presionin e gjakut
Sipas Shoqatës Amerikane të Zemrës, nivelet optimale të presionit të gjakut janë më të ulëta se 120 mbi 80 (120/80 mmHG). Sa më shumë të qëndroni brenda një diapazoni të pranueshëm, aq më të shëndetshëm do të jeni.
Përveç ngrënies së ushqimeve të shëndetshme dhe ushtrimeve të rregullta, sugjerohet uljen e sasisë së natriumit në dietën tuaj, kufizimin e marrjes së alkoolit dhe uljen e stresit.
Burimi: Huffpost